» Risk of hypertension with multicystic kidney disease  » ماهي علاقة السمنة بالأزياء لدى السيدات الخليجيات؟  » توافق صفاتك الجسدية مع صفات شريك حياتك دليل على نجاح حياتك الزوجية  » كيف يتعلم التلاميذ من مثل هكذا مدرسين؟  » طفلي (3- 6 سنوات) لا يأكل فماذا أفعل له؟  » لا سكينة.. يا سكينة ..!!  » مبارك يا صبريه ..!!  » رضا الله من رضا العبد  » هذا رزقك ياعبيد ..!!  » لماذا الختان؟  
 

  

حسين(سهل)الحافظ - 19/03/2009م - 9:00 ص | مرات القراءة: 2122


هي تجربة أولى , أحاول من خلالها السرد بشكل روائي لعمل مسرحي قدمته قبل سنة من الآن مع فرقة الفنون المسرحية بنادي العدالة ..
كلما جاد وقتي سأكتب مقطع منه على أمل أن ينال على شيء من رضاكم ..
مع خالص تحياتي وحبي


( 1 )


كل ألعاب الورق نعتمد على الحظ , فالحظ يلعب دوراً مهماً في الفوز والخسارة , ربما يحفظ كل لاعبي الورق المثل أو الحكمة التي تقول ( أعطني حظاً وارمني في البحر ) فيتم تحريفها لتكون ( أعطني ورقاً وارمني في اللعب ) أنت بحاجة إلى الكثير من الحظ لتمتلك الورق الجيد , أنت بحاجة للحظ في بعثرة الورق خلال عملية التوزيع , الحظ لحظة التوزيع عندما يخلط الحابل بالنابل , الكبير بالصغير , فقاعدة اللعب الأساسية , أن الكبير يأكل الصغير , ومن يضرب معه الحظ لحظة التوزيع , فتتوفر لديه الأوراق الكبيرة , فلن يكون بحاجة إلى أي ذكاء أو تخطيط , فاللعب يأتي هكذا بدون أي مقدمات , وبدون تخطيط , والفوز مضمون حتى لو تم كشف ورق اللعب لمن يملك الورق الكبير , في كل الألعاب لا يكون للولد أي أهمية تذكر , فهو مجرد ورقة من ضمن أكثر من خمسين ورقة لعب , فأن حسبناها في القوة فهو يأتي في المرتبة الخامسة من بعد الجوكر والأس والعجوز والبنت , وقد تنتهي اللعبة دون أن يتمكن الولد من أظهار مكامن قوته , في ورق اللعب فقط تتقدم البنت على الولد , في ورق اللعب تصبح البنت في درجة أولى قبل الولد ولكنها لا تزال أسيرة لحكم الرجل الذي يفرض سيطرته هنا وهناك وتجد أنها لا تزال بحاجة لحكمة العجوز أقوى الصور في ورق اللعب .
ربما الاختلاف وتغير القواعد هو ما أعجبني في لعبة ( البيلوت ) فاللعبة لا تعتمد على فرض القوة , ولا تخضع لقوانين اللعبة التي ذكرناها , فالفوز هنا للذكاء والدقة في اختيار المشروع لبدء لعبة جديدة , قد يحصل أحد اللاعبين على أقوى الورق لكنه لا يضمن الفوز فالمنطق في اللعبة غير موجود , ولا تضمن فوز الكبير على الصغير , فالذكاء مطلوب أولا في اختيار مشروع اللعب وثانياً في كيفية اللعب .
في لعبة ( الجوكر ) يكون ( الجوكر ) هو الأكبر ويأكل كل شيء , الدهاء في التوقيت , متى تستخدم الورقة الرابحة التي تستطيع بها أكل كل الورق , وفي لعبة ( الكوت ) الاعتماد على قوة الكبير , فلا ذكاء ولا دهاء وما هو إلا مجرد حظ خلط الأوراق فجمع كل الورق الكبير لدى لاعب دون غيره , مملة كل الألعاب على عكس لعبة ( البيلوت ) التي تحتاج إلى ذهن وذكاء مع كل لعبة جديدة , فلن يستفيد اللاعب من حصوله على أفضل الأوراق وأقواها , فذلك لن يضمن له الفوز الذي يبتغيه كل لاعب , فالفوز قديكون حليف من يملك أقل الأوراق قدراً لكنه يلعب بمشروع وذكاء يتناسب مع الأوراق الموجودة لديه , فالولد على عكس كل الأوراق يعود في بعض المشاريع ليفرض هيمنته على الكل , فلا يهتم لحكمة العجوز , ويكون أقوى من البنت , البنت ربما هي مشكلة اللعبة في الحصول على رضا البنت , ربما يتعدى الأمر كونه لعبة سيأتي لها وقت معين تنتهي فيه لنبدأ لعبة جديدة , ربما هو ما نعجز عن تحقيقه على أرض الواقع فنطمح إلى تحقيقه عبر ورق اللعب , لا أعرف ولا اعرف لماذا اخترت أن تكون البداية بهذا الشكل ..؟ , هل حقاً القارئ بحاجة لمعرفة قواعد اللعبة , وطرق الفوز والخسارة ..؟ , ربما ...

.
[اللهم صلى على محمد وآل محمد الطيبين الطاهرين
سوف أبدء بشخصيات المشهد
أبوعلي : رئيس الاستراحة
أبو سعد : عضو بالاستراحة معاهم معاهم عليهم عليهم .
ياسين : عضو في الاستراحة لا يهتم إلا بالتلفزيون ومحطات الأغاني .
منصور : عضو أخر بالاستراحة معتدل من عشاق لعبة البالوت .
ياسر : عضو بالاستراحة همه الوحيد المكالمات التليفونية .
شاكر: عضو بالديوانية ممن يهتمون بالسيارات .
أستاذ صالح : عضو بالجمعية الخيرية يزور الاستراحة لحثهم على الاهتمام بالمساهمة في أعمال الجمعية .
عيسى : عضو باستراحة مجاورة لاستراحتنا يحضر دائما بغرض استعارة بعض الأغراض
  مكان المشهد
عبارة عن استراحة من الاستراحات التي بدأت في الانتشار خلال الفترة الأخيرة والتي يجتمع من خلالها مجموعة من الشباب لشرب المعسل والتعميرة ومتابعة التلفزيون ولعب الورق واللعاب الأخرى


وصف المكان
طاولة عليها تلفزيون وجهاز رسيفرستكون على جهة بحيث لا تكون الشاشة مرئية للمتفرجين وجلسه عربية مع وضع بعض المعسلات والتعامير هنا وهناك ودلة شاهي وتوابعها في الوسط

اللهم صلي على محمد وآل محمد
[يفتح الستار حيث يتواجد أثنين من أعضاء الديوانية فقط في انتظار حضور البقية
ياسين ممسك بالريموت للتلفزيون ويتنقل ما بين القنوات
منصور يمسك بلعبة الورق ويلعب لوحده حيث يصف الورق ويعيد ترتيبها
عندما يبدأ منصور الحوار
منصوراقول وراهم الشباب تأخروا
ياسينعادي هذا وقتهم كل يوم .
منصور: المفروض يكون فيه وقت معين للحضور والانصراف بالديوانية مو كل واحد يجي ويروح على كيفه
ياسين:. وش رايك بعد تحط دفتر حضور وانصراف مو انت تحسبها وزارة مو دوانية
منصور:- لا مو القصد بس مو معقوله كذا كل يوم نجلس ننتظر على ما يكتملون اربعة ما يا مدينه نلعب الا وكل واحد دقت عليه زوجته واللي قال بيروح ينام وراه دوام وو ما اشوف الا بقيت بالديوانية بحالي
ياسين: يعني ذنبنا انك ما تشتغل ولا انت متزوج ولا وراك أي مسئولية
منصورما قلت ذنبكم بس يا أخي المفروض يكون فيه موعد محدد للديوانية كلنا نلتزم فيه
ياسين : اقول خلني اكمل اشوف البرتقالة لانك شكلك بتطلع قانون جديد وشكلك بتخصم من رواتبنا على هالتأخير
بعد لحظات سكوت قصيرة منصورتصدق اكو ناس عايشه
ياسين:ناس عايشه ليش يعني انت مو عايش ..؟
منصور:لا مو القصد مثل ما فهمت اقصد اكو ناس عندها ..
يعود ياسين لمتابعة التلفزيون ومنصورليش وأنت ما عندك ..
منصور: لا انت اليوم غير شكل قول ما ابي اسولف معاك يا أخي وريحنا .. انا أروح اولع على الفحم ابرك
ياسين:بتولع فحم ..؟
منصور:ايه بولع على الفحم
ياسين: اجل انتبه لا تحرق اصابيعك
يضحك ياسين وعندما يخرج منصور يرفع من صوت التلفزيون على أغنية البرتقاله
لحظات ويدخل أبوعلي مع طلال... طلال يرقص على صوت البرتقالة بينما أبو علي متضايق
ابو علي: أي أنت وراك رافع على صوت التلفزيون سامع الصوت من أطراف الديرة ناوي تفضحنا أنت بين خلق الله .
ياسين: أي فضيحة حنا ما طلعنا بديوانية بوسط النخيلات إلا علشان نفتك وكل واحد يكون حر وعلى كيفه خل اللي يسمع يسمع واللي مو راضي عمره لا يرضى
ابو علي : لا مو كلام يا ياسين حتى ولو كنا بعيد عن الديرة وبوسط النخيلات لازم يكون عنده شوي احترام للناس اللي تمر من جهتنا لا أحد يقول فيهم ولا شي .
طلال: يا أبوعلي خل الرجال يطرب نفسه والناس ما راح تتغير أحوالهم أن كنت قريب ولا بعيد بيحشون فيك بحضورك وغيابك
ياسين: صج كلام طلال وحتى لو ما يحصلون فيك عيب يشتغلونك اشاعات
ابو علي : لا مو كل الناس لا تعم .
طلال:لا مو كل الناس بس ماكو فايدة من كلامك الرجال بيطق اصبع . ( يطق اصبع )
ياسين: اقول خلني اتابع
ابو علي : عاد وش تابع من عرفتك وانت بس على الأغاني ارحم نفسك شوي مره برتقاله .. مره تفاحه .. مره مشمشة جالس تابع بسوق الخضرة .
طلال: سوق الخضرة وشوي وسب وشتايم
انا مرة سمعت اغنية بجوال ولدي بدايتها سبه
ابوعلي: بدايتها سبة .؟
طلال: ايه والله يا بوعلي كانت اللي يغني يقول ( لا العن ابو اللي بكاك ) عاد انا حمدت ربي قلت زين اللي مو واقف في وجهه كان صارت هوشة مو بس سبه
بوعلي يوجه الكلام لياسين,سب وانت فرحان على البرتقالة التفاحة

طلال كان قد جلس بعيدا يقوم ليكون قريب من ياسين وهو يقول: اشوف اشوف اللي ترقص ... اخ راحت ما تدري اذا بيعدونها بالبطيء مثل المباريات
ابو علي: ايه البنات اللي يرقصون يعني قدروا يقصون عليك وعلى أمثالك يخدرونكم كل يوم والثاني فاتحين قناة جديدة والف بنت ترقص وأنتم الله خير مثل المسبهين
طلال :خل عنك يا بوعلي قلت لك بتتعب ..
ياسين: تدري يا أبو علي أنا تزوجت قبل الدش لو أدري أنه هالقنوات بتفتح وهالبنات بترقص كان ما تزوجت
ابو علي : أقول مهما لفيت وشفت على هالقنوات ماكو احسن من بناتنا
ياسين: روح يا عمي روح شوف اللحم الأبيض المتوسط وأنت جالس تقول بناتنا
]بو علي: صدقني جمال بناتنا في عفتهم وسترهم
ياسين: أبوعلي خلك من كلام الأنشاء والتعبير وعفة بناتنا أنا أدري بناتنا مستورين وزينين بس نتزوجهم لكن لما نطالع نحب نطالع المعروض بالتلفزيون هالبنات المزايين شوف يا طلال هالبنت شخط
طلال: مو شخط هذي صاروخ سكود
ياسين: شوف يا طلال واسمع ابوعلي وش يقول حريمنا اللي لما تحب تتزين لزوجها حطت ثلاث صرات مشموم بينما شوف هالبنات ريحة العود تطلع منهم
طلال: ريحة العود ليش انت شامها
ياسين يكمل: يقول حريمنا يا شينهم لما يلبسون يعني يتفننون بالفساتين يعني ماركات وتصاميم عالمية وبالأخير اهم شي الزخمة بالوسط
ابو علي: أقول حريمنا ممكن يلبسون احسن من هاللي بالتلفزيون أنتوا جبتوا لهم وهم ما لبسوا
ياسين: لا مو حلو عليهم مهما تجيب لهم حريمنا ما يعرفون يلبسون مو حلو عليهم يا شينها يعني اجيب لها فستان تصميم فرزاتشي ودبتها مترين قدام يا شينها لا مو حلو إلا على البنات اللي بالتلفزيون ان جابتك مفصلة القوام والأرداف كلوا تناسق .
ابوعلي: يوم بناتنا مو عاجبينك وراك متزوج وحده منهم .
ياسين: وأنا وش جالس اقولك من الصبح انا متزوج قبل الستلايت وقبل ال LBC يا ويلي ويلات على جميلات لبنان شوف حتى في الكلام ماكو احسن منهم تقول لك تئبرني بن عمي احط رجليك بمي وملح مو زوجتي اذا دخلت البيت جاي من الدوام ماكو يعطيك العافيه او سلام على طول احط لك غدا ولا تغديت شوف يعني الذرابة ولا تغديت يعني وين بكون تغديت توني جاي من الدوام

ابوعلي: هذا أنتم مهما يسون الحريم لكم بطلعون فيهم عيوب اقول ارجع تابع برتقالتك قبل لا تستوي عصير
ياسين: ماكو احسن منه كوكتيل لذيذ الطعم
طلال: تصدق يا ياسين مرة جاي من الدوام وقفت السيارة عند البيت ونزلت الا والأرض تهتز خير اللهم اجعله خير قلت في نفسي أكيد زلزال رحت اركض على البيت ألا والباب يهتز والجدران تهتز والثلاجة تهتز وثيابي طاحت من الدولاب صرخت في العيال كل واحد يحتمي عند أقرب عمود علشان اذا طاح البيت ما يجيهم شي ورحت اشغل الراديو قلت ابعرف وش السالفة وش صاير بالدنيا لا يكون هجوم وحنا يا غافلين لكم الله بغيت اتصل بالجوال الا ماكو سيرفس لانه برج الجوال اللي قريب من البيت طاح على باص موظفين والباص دخل في سوبر في عايله 12 نفر والسوبر دخل في مزرعة دواجن وغبار ومطر وعواطف رملية والسبب في كل ذلك صويلح ولد جارنا بوصالح كان مشغل اغنية التفاحة
ياسين: خخخخخخ زين التفاحة لو البرتقالة كان صار فيكم مثل قوم عاد
يعود أبوعلي ليسال ياسينألا ياسين كم صار عندك عيال للحين
ياسين: ما عندي ألا توم
طلال: عندك توم اجل الله يعطيك جيري بعد علشان تكتمل البرتقالة .
يرفع ياسين من صوت التلفزيون عندما يعود منصور وبيده راس تعميره يضعه على التعميره ويسلم على أبوعلي
عندما يجلس منصور يسمعون صوت تفحيط سيارة وصوت المسجل عالي جدا
'عندها يقول منصور: جاكم بوخبال .
-طلال: وانت الصادق أبو خبال أبو خبال أقول يا شباب شوفوا لكم حل في ابوخبال هذا ترى مكلمني واحد من الشباب يقول ديوانيتنا صارت ديوانية صغار ومخبلين فأنا أقولكم يا تكلمون الرجال يهجد ويعقل عن خبال هالسيارات ولا لا يجي الديوانية
طلال: أي ترى مو ناقصين كلام كلنا فوق الثلاثين الا هو حتى ثانوية ما خلص وهايت وسمعت ان اهله يقولون ان ديوانيتنا اللي مخربينه
منصور: أي ديوانيتنا اللي مخربينه ترى هو يمر يجلس عندنا يمكن نص ساعة يشرب هالمعسل وبعدين يدوج من مكان لي مكان يتابع هالتفحيط يعني هو خربان خلقة اهله مو راضين عليه يمسكون ولدهم مو يقولون حنا مخربينه
طلال يكلم ياسين : ياسين انت تمون على هالمخبل شوي كلمه خله يهجد شوي وينتبه لدراسته وبلا هالمطارد ورى السيارات
يدخل شاكر وقد سمع جزء من الحديث: هاي شلة منو اللي يطارد ورى السيارات كم موديلها وش نوعها الصراحة فاتكم يا شباب توني جاي من الجبل تفحيط على كيف كيفكم سيارات اخر موديل وبالا خير فاتكم راعي كاميري توه شكله يتعلم دخل بثلاث سيارات وطير اثنين من اللي يتفرجون مسح فيهم الاسفلت ما اظن يعرفونهم الا من بطاقة الاحوال .
وحضرتك فرحان ومتحمس مو هذا انتم يا رواعي التفحيط كل يوم حوادث والقهر ولا مره سمعت راعي تفحيط مات ما يموت الا اللي معه او اللي يصدمونه وهو تقول ولد
ابليس يطلع منها ولا شمخ واضرب لك مثل
منصور:لا حرام عليك
ابو علي :وش حرام علي
منصور:لا تضرب المثل تراه ما يستحمل كفين الا ويطب ساكت ..
ابوعلي : انت اللي يبيلك كفين مو المثل علشان نفتح فيوز مخك هالمغفله ما علينا تشوف
هالمفحط يصدم له كم سيارة ويموت له كم بزر وبعد ما يسجنونه يجونك الناس تنازل تراه فقير
طلال:يومه فقير ليش يفحط ما تدري . . وابي اعرف بس من وين يجيبون السيارات لانه كل ما سوى واحد فيهم حادث قالوا السيارة حقة رفيجة
ابوعلي يكلم طلال: اقول يا شاكر شوف لك حل في نفسك تراك اخر سنة بالثانوية وانت هايت ورى هالتفحيط واهلك مثل ما سمعنا مو راضين على وضعك فانا اقولك يا تعدل وضعك يا لا تشبهنا معاك بالديوانية أكبر.
شاكر:أكبر يعني كم يصير عمري
بو علي :أنا اكلمك جد
شاكر:يوأنا اكلمك عم .
أبوعلي يحذف شاكر بأحد المخدات 


منصور: يلا شباب يلا اربعة ما صدقنا نكتمل اربعة
ياسين: لا انا مو لاعب ما اقدر اترك البرتقالة .
منصور: يا شيخ 24 ساعة جالسين يعيدون فيها تعال العب زات
مع حديثه يدخل ياسر وهو ممسك بهاتفه الجوال: ايوه حبيبتي اش كنا نقول
ايوه ارسل لك بطاقة شحن مو مشكلة يا عيوني ثواني وارسل لك رقم البطاقة واتصل عليك بعد شوي .
منصور يحدث ياسر
هذا اللي أنت فالح فيه ترسل بطاقات شحن علشان تكلم واحد ثاني غيرك
يضحك ابوعلي وهو يضيف: ايوه صدقت يشحن لها وبعد تتصل عليه وتسكر ليش ما تدري يعني خسران من الجهتين الفاتورة تجي عليه والشحن عليه حق غيره
ياسر: خخخخخ ضحكتوني ما عندي ربع ليرة اعطيكم .. اصلا هذي ما تكلم احد غيري واذا شحنت او اتصلت فلوسي وأنا حر جيت لواحد منكم وقلت له عطني او سلفني ..؟
طلال: وراك قلبتها جد وزعلت الشباب يمزحون معاك
ابوعلي: اقول ياسر بغيت الحق ما قلنا مو فلوسك بس من جد قاعد تضيع وقت وتتلاعب بنات خلق الله يعني اذا لك رغبة تزوج وبلا هاللعبة
ياسر: اتزوج ليش قالوا لك عني خبل ولا اهبل
طلال: ليش اهبل يعني ما يتزوج الا الاهبل .
شاكر: زين قلتوا علشان في المستقبل ابقا بعقلي .
ياسين: ياسر صج تزوج بس تزوج لبنانية تقولك تئبرني ابن عمي .
ابوعلي : جعلني اقبركم اثنيكم في يوم واحد
منصور: اقول ياسر ما عليكم منهم وبلا زواج وبلا خربطة تجيب لك وحده تتحكم فيك وين رايح ووين جاي وجيب وودي وهات وشوي الا جايبه لك ولد وحريمنا الله بالخير مو مثل حريم العالم مثل الارنب كل ثلاث شهور ولد وهات حفاظات وهات حليب وودي المستوصف تطعيم واسهال وربو اقول خلك على ما انت عليه وتعال نلعب زات وبعدين هذي خويتك ضبطني مع اختها .
يجلسون الاربعة منصور وياسر وشاكر وابوعلي من اجل ان يبدؤن باللعبة عندما
يقول ابوعلي وهم في نفس الجلسه: اقول يا شباب القطه الشهرية ترى توكم مستلمين رواتب
ياسين: تونا قاطين ماسرع خلص الشهر .
ياسر: اقول انا ما عندي فلوس ممكن تاخذون قطتي بطاقة شحن
طلال: لا بطاقة الشحن خلها لخوياتك حنا نبي فلوس
ابوعلي: شباب بكرة لازم كلنا نقط لانه الشاي بيخلص والفحم والجراك واشتراك بطاقة المباريات بينتهي فرجاء لا تحرجونا .

....يتبع



التعليقات «0»


لاتوجد تعليقات!